Heydər Əliyev Mərkəzində Endi Vorholun “Həyat, ölüm və gözəllik” sərgisi açılıb

Heydər Əliyev Fondunun və Endi Vorhol Muzeyinin birgə dəstəyi ilə Bakıda XX əsrin məşhur rəssamı Endi Vorholun əsərlərindən ibarət “Həyat, ölüm və gözəllik” mövzusunda sərgi təşkil edilib. Heydər Əliyev Mərkəzində keçirilən açılış mərasimində Mərkəzin direktoru Anar Ələkbərov çıxış edərək fəaliyyətə başlamasından ötən qısa müddət ərzində Mərkəzdə artıq bir neçə sərgi təşkil edildiyini, eləcə də burada bir sıra möhtəşəm tədbirlər keçirildiyini diqqətə çatdırıb: “Bizim əsas məqsədimiz ölkəmizi dünyada tanıtmaq, Azərbaycan həqiqətlərini dünya ictimaiyyətinə çatdırmaq, mədəniyyətimizi təbliğ etmək və təbii ki, dünya mədəniyyətinin ən yüksək nümunələrini Azərbaycanda nümayiş etdirməkdir. Artıq ölkəmizin simvoluna çevrilmiş Heydər Əliyev Mərkəzinin binasında ümummilli liderin anadan olmasının 90 illik yubileyi münasibətilə Heydər Əliyev Muzeyi də fəaliyyətə başlayıb. Həmçinin burada təşkil olunmuş “Azərbaycan inciləri” sərgisində qonaqlara Azərbaycanın tarixi və mədəniyyəti haqqında geniş məlumat verilir. “Mini Azərbaycan” sərgisi də Bakıdakı və Azərbaycanın regionlarındakı tarixi memarlıq abidələrinin tanıdılması baxımından mühüm əhəmiyyət kəsb edir. Eyni zamanda buradakı fotosərgilər də çox böyük maraq doğurur”.

Müasir incəsənətin həyatımızda böyük rol oynadığını deyən A.Ələkbərov bu istiqamətdə Heydər Əliyev Fondunun dəstəyi ilə Azərbaycanda yaradılan Müasir İncəsənət Muzeyinin fəaliyyətini xüsusilə vurğulayıb: “Yarat!” Müasir İncəsənət Məkanının müvafiq istiqamətdə fəaliyyət göstərir. Bu il 55-ci Venesiya Biennalesində Azərbaycan və “Yarat!” Müasir İncəsənət Məkanının pavilyonları çox yüksək nailiyyətlər əldə edib. Azərbaycan pavilyonu Venesiya Biennalesi tərəfindən 5 ən möhtəşəm pavilyon sırasına daxil edilib. Bütün bu nailiyyətlər nəzərə alınaraq məhz Heydər Əliyev Mərkəzində müasir incəsənətin banisi olan XX əsrin məşhur rəssamı Endi Vorholun “Həyat, ölüm və gözəllik” mövzusunda sərgisinin təqdim edilməsi qərara alınıb. Bu sərgi mədəniyyətlərarası dialoqun yaradılmasında, müxtəlif mədəniyyətlərin, o cümlədən müasir incəsənət nümunələrinin təbliğində və yaşadılmasında əhəmiyyətli rol oynayır”. Sərgidə 100-ə yaxın əsərin nümayiş etdirildiyini deyən Anar Ələkbərov bu işin təşkilində böyük əməyi olan Endi Vorhol Muzeyinin rəhbərliyinə təşəkkürünü bildirib.

A.Ələkbərov Azərbaycanın birinci xanımı, Heydər Əliyev Fondunun prezidenti, UNESCO-nun və İSESCO-nun xoşməramlı səfiri, Milli Məclisin deputatı Mehriban Əliyevaya bütün bu layihələrin hazırlanmasında, əsərlərin Azərbaycana gətirilməsində göstərilən dəstəyə görə xüsusi minnətdarlığını ifadə edib, layihəyə bilavasitə nəzarət edən Heydər Əliyev Fondunun vitse-prezidenti Leyla Əliyevaya dərin təşəkkürünü bildirib.

Endi Vorhol Muzeyinin direktor müavini Patrik Mur rəssamın Azərbaycanda, Heydər Əliyev Mərkəzində ilk dəfə keçirilən sərgisini təqdim etməkdən məmnunluğunu və ziyarətçilərin bu sərgidən zövq alacağına ümidvar olduğunu deyib.

Sərginin kuratoru Cianni Merkurio bu tədbirin Azərbaycanda keçirilməsini mədəniyyət sahəsində əlamətdar hadisə adlandırıb. O, Heydər Əliyev Mərkəzində Endi Vorholun sərgisində iştirak etməsindən böyük şərəf duyduğunu deyib: “Bu Mərkəz gələcəkdə bir çox mühüm layihələrə ev sahibliyi edəcək və Bakını müxtəlif mədəniyyətlərin kəsişdiyi bir nöqtəyə çevirəcək”.

Modern incəsənətin məşhur nümayəndələrindən olan Endi Vorholun Azərbaycanda ilk dəfə keçirilən sərgisində rəssamın 100-dək əsəri və qısa filmləri yer alıb. Sərgidə rəssamın portretlər, avtoportretlər silsiləsindən rəsmləri, eləcə də “Güllər” (Flowers), “Kamuflyaj” (Camuflaje), “Sonuncu şam yeməyi” (The Last Supper), “Dua edən kişi əlləri” (Male hand Praying), “Elektrik stulu” (Electric Chair) və digər dünya şöhrətli əsərləri nümayiş olunur.

Sərgi təkcə Endi Vorhol haqqında deyil, eyni zamanda, avanqard film, pop-art barədə geniş məlumat əldə etməyə imkan verir.

Əsərlərinin orijinallığı, hər bir incəsənət nümunəsinə özünəməxsus üslubda yanaşma tərzi olan Endi Vorholun Heydər Əliyev Mərkəzində sərgilənən əsərləri maraqlı kompozisiyada təqdim edilir. Bu kompozisiya görkəmli rəssamın “Həyat, ölüm və gözəllik” fəlsəfəsini daha yaxından tanımağa, əsərlərin hər birində rəssamın daxili dünyasını görməyə imkan verir.

Endi Vorholun əsərlərini dünyanın bir çox muzeylərində təqdim edən Endi Vorhol Muzeyinin geniş səyyar sərgi proqramı var. Muzeyin 1996-cı ildən etibarən 40 ölkədə təşkil etdiyi sərgiləri 10 milyondan çox ziyarətçi izləyib. Endi Vorholun “Həyat, ölüm və gözəllik” sərgisi burada nümayiş olunan əsərlərin dəyərinə görə indiyədək Azərbaycanda nümayiş etdirilmiş sərgilərdən ən qiymətlisi hesab olunur. Adıçəkilən sərgi sentyabrın 9-dək davam edəcək.

S. ABDULLAYEVA

525-ci qəzet.- 2013.- 25 iyun.- S.7.